ǀAeǁgamsa xu Addis Ababas ǁga ra ǁkhanagaru tsî 39 400 ǀgapisi !hūbaiba xu hâ soab !nâ ta ge tita !gâi hō!âde ra Italieb !hūǁîra ti xōǀkhā ge ǂnôa i ra Namibiab xa ra !hoa !khaisa ge ǁnâu.
ǁÎra ge ǀgam wekhena ge !khōǂgā hâ i saris Namibiab ǁgas khao!gâ, !khō ra ge kikide ra kōse, nē !hoasa ge ūhâ i. Perugias, ǁaupexa 100 kilometerga Romeb ǀawas ǀkhab ai ǁgoesa xu !huihâ Claudio Antonio Stinchib tsî Sara Becchettis hâra ge 12 tsēde Namibiab !nâ hâ tsî aiǁgause Etosha !Hū!nāsi ǀGuru!hanab, ǀUes, ǂGaimgu (Spitzkoppe), Skeleton Coast, Sandwich Harbour, Sossusvleib tsî Deadvleib hâna. “Sim ge Afrikab ǁga gere sari ǂgao, ǁnāti ī !hūb hîa buruxa mûhesa-anusiba !khōǂgā hâb, !namiba sari, ǀguruna si mû, haiǀgoms, !kharagagu !hao!nāsi ǁnaetiga ūhâ khoena ǀhao-ū tsî ǀams ai hoa xūna ǀguri hâse tsî !norasa !khaib !nâ dīsa. Namibiab ge hoa ǂgaoǀkhādi ai ge dīǀoaǀoa tsî ǁnā-amaga ge ǂhanu ǁhûi i,” ti ra ge gere mî.
“Sim ǁgamrogu ge kaise ās !aroma ge ǀgū i. !Namib !nâ ǀguis ose, xawe !aub !nâs tsîna. Italieb ge a îxa, xawem ge ǁnā īsiga ǁnaeti hâ”. Nē khoera !narisarimas ge ǀAeǁgams !nâ tsoatsoa tsî ǀgam tsēra Etosha !Hū!nāsi ǀGuru!hanab ǁga ge !kharu.
“Sim ge !gâi!gâ tsî sao ra xamarina ǂgui !gôagu !nâ ge mû: ǂkhoan, !goaren, ǀamin, !garogoman, xamn, gairin, anin, xain, !airin, ǀgaen, impalan tsî xaran tsîna. Mâ !khaib hoab ge ǁîb !khōǂgā hân ǀkha kaise ge ǂoaǂamsa i,” ti ra ge ra ǂâi-oa. Namibiab !nâ aitsama nî !narimase is ge ǁî-aitsama kaise ge ǀō-aisa hō!â i. ǁÎra ge a mî ǁoa mâtikō !nāde ra audoba ǂgaemâi tsî kikide gere !khō !khaisa. “Sim ge ǀUes !â!âb ǁga !nari tsî ǁnā ǀkhāb ai ge doesī Himba ǀhûhâsib gūse ǂnaumâi tsî gūse în !hao!nāsi ǁnaetiga ge !hara.
Nē ǁnaetigu tsî dīgaugu ge sida ǁnaetisa ûiǀgaga xu kaise ra !kharaga, tsî xawe !gâise khoetsa gere tsâ kai.
Becchettis ge tent-i !nâ ǁom-e tātsē ǀnamsa tama khoesa, xawes ge ûitsēdes nî ǂâis !nâ ūhâ ǂan-tsî-hō!âsa ge hōbasen. Italieb sari-aora ge !auga!hūǁîna gere ǀawemā, Afrikab ǁga hâ sari-en nî ǂâi!nâǁguis kara, o-i ǀnî !hū-i Namibiaba nî dā-e a ǀkhai !khaisa.
